1Cor 14 | BEF | STEP | Ya hu'ehina'mu lenali bona'i leniginaga fi epelete enehe'malune lite nelitemo amuya malalo. To analo'i Hu'mamofihi Sikalafu'a nolepina amuya luga'a lilune lite nelitemo amuya malalo. Ya hite nehite Hu'mamofihi bagaguti ka'a lu huto hilata nasana'muko kehelinogo tino.

1 Corinthians 14

Hu'mamofihi bagaguti kaga beto hu epilata nohutauba tito ni'ibe

1 Ya hu'ehina'mu lenali bona'i leniginaga fi epelete enehe'malune lite nelitemo amuya malalo. To analo'i Hu'mamofihi Sikalafu'a nolepina amuya luga'a lilune lite nelitemo amuya malalo. Ya hite nehite Hu'mamofihi bagaguti ka'a lu huto hilata nasana'muko kehelinogo tino. 2 Luga'amagi fato enonogoguti fa'mene ana'asi lilata nehana ya'ma bona'i lu meepise Hu'mamofihi lu emilata nehabe. Enali ya'ma Sikalafu'uba enele'mo bati hu'ehigo Hu'mamofihi suguna ka'a nelago bona'i luga'amagi keheli negi nelata nehanaya, Hu'mamofihi bagaguti kaga'a lu huto nehana enali bona'i monolugu enele'mo olopa hilata nehabe, to enele'mo amuya melelata nehabe, to enele'mo ba yegelata nehabe. 4 Fato enonogoguti ana'asi lilata nehana enali komopa'ani le'mo hetofa hilata nehanaya Hu'mamofihi bagaguti lu huto hilata Hu'mamofihi kagu nehanamagi enele'mo hofa telata nehabe.

5 Lenali fato enonogoguti lilana hapa'a li su halabe luto keheli'ohunaya, Hu'mamofihi bagaguti kaga'a li huto hilana'mu yabe luto kehelinogo tilina'mu yabe. Hu'mamofihi bagaguti kaga'a beto hilata nehana bona'magi fato enonogoguti lilata nehabe ya'ma enebe ligi'ehibe. To fato enonogoguti nelinogomo to bo moneuba ka'ani lu gelehe huto lu hokolo hilina bo nohinogomo ana ka nelanauba asaga bona'i Hu'mamofihi kagalugu enele'mo hofa talabe. 6 Nalalu'nigita, nani lenalitoga nobugo Hu'mau lu huto huto lu nimi'ehina ka'a to mono ka hapa'a mone luga'a to komopa'nigu keheli'ohuna ka'a to Hu'mamofihi ka'a komopa'niguti beto huto lenelepise ka'a lu huto hu nolepito fato enonogoguti kaga lu nolepinogo yanauba hena hena huto fi hele hu lepalalibe?

7 Fa'mene nasana sipilohi yamofihi hetofa lite fu melinogomo ya hena huto nogo sipi malalina kehelilune. 8 To ufehi enonogo'a bati huto fu melilana ya'ma henana'mu kehe noibe lite bite luba hilana nasana le'mo bati mehilana'mu yabe. 9 Ana suhi hite lenali fato nogoguti lilana yamofihi bona'i luga'amagi hena hena hite kehelilabe. Fa'mene fato enonogoguti nelinogo kagatini yamofihi habafahuba li sibi saba hinogo fa'menena lolo hilube'mu hibe. 10 Negekesa keheluna noto noto fato fato enonogo ni'ibe, to keheliluta kamogo ni'inaya, fa'mene nani enonogo mone keheli sibina hiluna ya'ma enonogomofihi afo'afu nani kumu kehelito fato hepato bo lolo hiluna'a hube, to nani ana suhi huto ai kumu kehelito fato hepato bo lolo hilina'a nohibe. 12 To lenali hapatini ana suko huto ni'ibe. Sikalafu'mofihi amuya lenalitoga huto hilibe lite amuya melelata nehanamofihi bati huto ni'inaya, Yesuhi naga'a Hu'mamofihi enele'mo hofa talabe litemo amuya malalo.

13 Ya hu'ehina'mu fato enonogoguti kaga fa'mene ana'asi lilana bona'magi hapa'a bati hilete lu hokolo hite lu epilanamofihi amuya lilune litemo Hu'mamofitoga kehe ilabe. 14 Nani fato enonogoguti Hu'mamofitoga lilunamofihi nipa'niguti tinogo lilube'mu hube. Negekesa'niuba nasana lamana'a li huto mehilina'mu yabe. 15 Ya hu'ehina ya'ma hena hena hilube? Ya suhi hinogo bati hilube'mu hibe. Sikalafu'uba komopa'nigu babahi higo nani Hu'mamofitoga loka nohago negekesauba keheli fe nolinogo nabagatu lu huto hilube. Sikalafu'uba komopa'nigu mono nama hiti noligo ana huto negekesauba keheli fe nolinogo nabagaloti lilube. 16 Ya mehiluta ya'ma kai komopakatuko Hu'mamofihi fokehi halube luto lilata yamofihi kaitogati ya suhi keheli bati mehilata bona'i luga'amagi kai kaka mekehelilana'a ni'inaya enali hena hena hite lama'naka yabe lite lilabe. 17 Kai Hu'mamofihi fokehi lamana'a lilata'a hetofana hiti kalalukafu ya'ma keheli bati mehinogo hena huto komopa'a le'mo hetofa hu etalibe?

18 Fato enonogoguti kaga lulatana yamofihi nani ya'ma babu luto lulata lenebe ligito lulata nohube. Ya hu'ohuna'mu Hu'mamofihi fokehi lilata nohunaya, nani ya'ma kehelinogo lamana'a lolo hitine. Li gehesagu fato enonogoguti kaga yatamalo lilube lutomo fa'mene lutita ni'inaya nani ya'ma kehelugo nolimibe. To komopa'ni negekesatu keheli fe luto bona'i enele'mo bati bati hilube luto ya'ma mono ka loesimo lu epilatana'mu yamofihi kehelugo notibe.

20 Nalalu'nigita, fato enonogoguti kaga lulatana'mu yagapana inapupagi suhi hite minete foipa hapa'a mekehelilo. Ya hite, minalanaya yagapana inapupagihi kehelise'na hiti meminalo. Enali kaga keheli fe menelibe. To lenali kaga kehelite le'mo fe lilune lite ya'ma olopa bona'magihi kehelise suhi lilo. 21 Mono bukugu kaga mone ma lite fayahi keye'ahana:

Sipi Bouba ma luto nolibe:
Nani mone fato hepatoga bona'i
enele'menogo
enali ete ma bona'magihi
ya'ma fato enonogoguti
nani nabagaguti kaga lu epilanamoya
fa'mene ka'ni mekehelilana'mu yabe.

22 Anamofihi luga'a ka lilugi kehelilo. Fato enonogoguti kaga sibigopa lulatana yanauba Hu'mamofihi ka keheli'ahana bona'magi kumu luto babeyafa'a huto menohibe. Hu'mamofihi ka mekeheli'ahana bona'magi topa halabe luto babeyafa'a ni'ibe. To Hu'mamofihi bagaguti ka'a bati huto lu huto hu epilata'a yanauba Hu'mamofihi ka mekeheli'ahana bona kumu yabe lutomo meni'ibe. Hu'mamofihi ka keheli'ahana bona'magihi ya'ma lufusa'ani ule'ale hulata ni'ibe.

23 Ya hu'ehina'mu lenali asaga'i Yesuhi naga'a li nupa hite fato enonogoguti kaga lite nelinogo, yamofihi kana'a mono ka mekeheli'ahana bona'ifi to fegutoga bona'ifi tite kehelite negi nagi nenabe lite kehelilune'mu habe. 24 To Hu'mamofihi bagaguti ka'a bati huto lu huto huto nehinogo, Hu'mamofihi mekeheli'ehina bofi, fegutoga nehana bo moneuba lenalitoga tito ka kehelilube'mu hibe. Ya hilinauba ya'ma asagato foipana'amofihi hapa'a lu huto hi etete ka foyagu le'mo malalana'mu yabe. 25 Ya hilenogo komopa'agu nasana fala kito ni'inamofihi huto hilenogo ai mino fe luto melugu golaga fito minoto Hu'mamofihi lahupa fi emito Hu'mau lama'naka lenalitoga nohibe luto lilube'mu hibe.

Mono kamofihi nasana neheti su hoto nehetino

26 Nalalu'nigita, ya hu'ehina'mu hena hilune? Lenali mono kamu'i li gehesa hilune lite nehitemo ya'ma Hu'mamofihi kagagu lenele'mo moneko moneko'i hite hofa talanamofihi hapa'a ya'ma hilata nehabe. Moneuba mono nama lelito olata nohibe. To moneuba kaga giyaka lito lu epise kaga lelito olata nohibe. Moneuba Hu'mamofihi bagaguti kaga'a fato fato'mofihi lelito olata nohibe. Moneuba fato enonogoguti lulatamofihi lelito olata nohibe. Moneuba fato enonogoguti lu'ehina kagamofihi hapa'a lu hokolo hilinamofihi lelito olata nohibe. Ana suhi asaga lilana Yesuhi naga'a enehe'moto amuya molo epalalibe lite ya suhi hilo. 27 Fato enonogoguti kaga lilana yamofihi asaga bona'magita melilo. Loefi loeyagi moneyagifi enalisigo ya suhi lite moneko moneko nelinogo moneuba hapa'a lu gelehe huto lu epino. 28 Mono kagu li gehesa hite nehite hapa'a lu gelehe huto lu epilina bo mone menehinogomo to moneuba fato enonogoguti lilube'mu nohuto'amo ai kaga luse mineno. Ai'asigo monetoga nohuto ai'a ka hiti to Hu'mamofitoga lino. 29 To Hu'mamofihi bagaguti kaga ya'ma bona'i loemofi, loebe monebefi enali lu huto hite lilune'mu nehinogomo, luga'amagi enali nekehelite kaga'ani loko hite kehelilana'a legeso hite minalabe. 30 To li gehesa hi'ahanalo mone bouba legeso huto nohigo Hu'mamofihi Sikalafu'uba komopa'agu yuhufa kaga emigo lilube'mu nohutomo kohe toto lilina bouba ya'ma fa'mene nohinogo lino. 31 Ya hite, Hu'mamofihi bagaguti kaga lilune lite nehitemo, fa'mene lu su halabe. Ya nehite moneko moneko lilenogo, luga'a enali mono ka kehelinogo komopa'ani babahi hilibe. 32 Hu'mamofihi bagaguti kaga lu huto hilana bomagi lu huto hilana'mu kaba hite minalabe lite li'ahanamo ni'ibe. 33 Hu'mau ya'ma le'mo sibi sibi hilina nasanamofihi afo'afu menohibe. Ai'a lele'mo fu luto minalina'muko ekesa kehelilata nohina afo'afu nohinagihe.

Kilisitohi naga'a asaga'i mono kalo li nupa hite nehago ya'ma 34 ana'magi enali kaga melise fa'mene mineno. Ana'magi ana li gehesagu kaga lilana meni'ibe. Ana'i ana suhi hite kaba bo meminalabe luto Moseu keya ka lu'ehina kagu ya'ma limite minalabe lutomo ni'ibe. 35 Enali mono nasana mone kumu loka halune lite nelitemo noha'aniluga minete baha'animagihi enoloka henogo lu keheli fa keheli hilabe. A'i moneuba mono kalo li nupa hi'ehilanagu kaga lilinamofihi lubuya huse nasana ni'ibe.

36 Hu'mamofihi kaga'a lenalitogati hapi huto hulago ya suhi lilata nehafihe? To lenalitinisigo keheli'ahana ni'ifihe? O'e, ya huto meni'ibe. 37 Lenalitogati moneuba ai'amu kehelinogo, mono ka lu huto hulata bo lamana'a lolo hilina to komopa'agu Sikalafu'a hiti bo lolo hilina ya'ma, ka fayahi koyoto nolepuna asaga'i yamofihi Sipi Botiuba lu molo'ehinamo ni'ibe luto kehelino. 38 Bona'i moneuba ya'ma kaga keheli he'milina yamofihi ai kaga'a mekehelilo.

39 Ya hu'ehina'mu nalalu'nigita ma lite kehelilo. Hu'mamofihi bagaguti kaga li huto hilune litemo amuya malalo. Fato enonogoguti fa'mene ana'asilo lulatanamofihi o'e lite meli epalalo. 40 Mono kumu li nupa hite minete ana'ina silaga'i hite melete hilana yamofihi lamana huto legeso huto bu baga ino.